Үндсэн хуулийн цэцийн 2015 оны 9 дүгээр сарын 30-ны өдрийн Дугаар 12 дүгнэлтээр “ Монгол Улсын Их Хурлын сонгуулийн тухай хуулийн 26 дугаар зүйлийн 26.6 дахь хэсэгт “Улс төрийн албан хаагчаас бусад төрийн албан хаагч, төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах албан тушаалтан Улсын Их Хурлын гишүүнд нэр дэвших бол сонгуулийн жилийн нэгдүгээр сарын нэгний өдрөөс өмнө төрийн албанаас болон ажил, албан тушаалаасаа чөлөөлөгдсөн байна.” гэж заасны “…бусад төрийн албан хаагч…” гэсэн нь Монгол Улсын Үндсэн хуулийн Арван дөрөвдүгээр зүйлийн 2 дахь хэсгийн “Хүнийг … эрхэлсэн ажил, албан тушаал …-аар нь ялгаварлан гадуурхаж үл болно .” гэснийг зөрчсөн байна гэж дүгнэсний дагуу Улсын их хурлын сонгуулийн тухай хуулийн холбогдох зүйл, хэсгийг 2015 оны 09 сарын 30-ны өдрөөс эхлэн түдгэлзүүлээд байсан билээ. Үндсэн хуулийн энэхүү дүгнэлттэй холбогдуулан УИХ-ын нэр бүхий гишүүнээс Улсын их хурлын сонгуулийн тухай хуульд нэмэлт өөрчлөлт оруулах тухай хуулийн төслийг 2011 оны 11 сарын 6-нд өргөн мэдүүлсэн бөгөөд уг хуулийн төслийн дагуу “Монгол Улсын Их Хурлын сонгуулийн тухай хуулийн 26 дугаар зүйлийн 26.6 дахь хэсгийн “Улс төрийн албан хаагчаас бусад” гэснийг “Төрийн жинхэнэ албан хаагч болон төрийн үйлчилгээний албаны удирдах албан тушаалтан,” гэж өөрчлөхөөр болж байгаа юм байна. Өөрөөр хэлбэл Улс төрийн албан хаагч,Төрийн жинхэнэ албан хаагч, Төрийн үйлчилгээний албаны удирдах албан тушаалтан нар нь Улсын Их Хурлын гишүүнд нэр дэвших бол сонгуулийн жилийн нэгдүгээр сарын нэгний өдрөөс өмнө төрийн албанаас болон ажил, албан тушаалаасаа чөлөөлөгдсөн байх шаардлагагүй болно гэсэн үг юм. 2015 оны 11 сарын 20-ны өдрийн УИХ –ын намрын ээлжит чуулганы нэгдсэн хурлаар уг хуулийн төслийг хэлэлцэх эсэх асуудлыг хуралдаанд оролцсон гишүүдийн 86 хувийн саналаар дэмжигдэн хэлэлцэхээр болж холбогдох байнгийн хороонд шилжүүллээ.