Монгол улсын засгийн газрын 2018 оны 1 дүгээр сарын 3-ны өдрийн 5 дугаар тогтоолын 1 дүгээр хавсралтаар “Нөөц ашигласны төлбөг болон тусгай зөвшөөрлийн төлбөрийг төлөх, хуваарилах, зарцуулах журам” батлагдсан бөгөөд 2018 оны 3 дугаар сарын 26-ны өдрийн №12 дугаар Төрийн мэдээлэлд албан ёсоор нийтлэгджээ. Журмаар газрын тосны нөөц ашигласны төлбөр болон хайгуул, ашиглалтын тусгай зөвшөөрлийн төлбөрийг төлөх, хуваарилах, зарцуулах үйл ажиллагаатай холбогдсон харилцааг зохицуулах ба газрын тосны нөөц ашигласны төлбөрийг газрын тос олборлож худалдахаар хэмжсэн болон ашигласан тухай бүр нь бүтээгдэхүүн хуваах гэрээнд заасан хувиар тооцож ногдуулна. Улмаар гэрээлэгч тухайн сард олборлож худалдахаар хэмжсэн болон ашигласан газрын тосны хэмжээ, үнийг үндэслэн нөөц ашигласны төлбөрийг тооцсон тайлан, мэдээг дараа сарын 20-ны дотор гарган газрын тосын асуудал хариуцсан төрийн захиргааны байгууллагад хүргүүлэх бөгөөд харин төлбөрийг 25-ны дотор мөн байгууллагын дансанд төлөхөөр зохицуулжээ. Газрын тосны нөөц ашигласны болон тусгай зөвшөөрлийн төлбөр төлөлт, хуваарилалт, зарцуулалтанд Газрын тосны асуудал хариуцсан төрийн захиргааны байгууллага болон холбогдох хяналт шалгалтын байгууллага, Төсвийн асуудал эрхэлсэн төрийн захиргааны төв байгууллага, холбогдох шатны төсвийн ерөнхийлөн захирагч хяналт тавьж ажиллах юм байна. Нөөц ашигласны төлбөр болон тусгай зөвшөөрлийн төлбөрийн асуудлаар маргаан гарсан тохиолдолд холбогдох хууль тогтоомж болон бүтээгдэхүүн хуваах гэрээний дагуу шийдвэрлэхээр зохицуулжээ.