Улс тунхагласны өдрийг нийтээр тэмдэглэдэг баярын өдөр болгохоор хуульд нэмэлт, өөрчлөлт орууллаа Уг хуулийн төслийн хэлэлцэх эсэх асуудлыг Төрийн байгуулалтын байнгын хорооны 2016 оны 11 дүгээр сарын 16-ны өдрийн хуралдаанаар хэлэлцэж дэмжсэн. Харин УИХ-ын чуулганы 2016 оны 11 дүгээр сарын 17-ны өдрийн нэгдсэн хуралдаанаар уг хуулийн төслийг хэлэлцэхийг дэмжээд анхны хэлэлцүүлэгт бэлтгүүлэхээр шилжүүлсэн байна. УИХ-ын гишүүн Я.Содбаатар, Б.Жавхлан, Г.Мөнхцэцэг, О.Баасанхүү, Ж.Батзандан нарын санаачлан боловсруулж өргөн мэдүүлсэн “ Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай ” хуулийн төслийн анхны хэлэлцүүлгийг хийсэн. Улсын Их Хурлын чуулганы 2016 оны 11 дүгээр сарын 18-ны өдрийн нэгдсэн хуралдаанаар гишүүдийн өргөн мэдүүлсэн “ Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай ” хуулийн төслийг анхны хэлэлцүүлгээр нь батлажээ. Ингэснээр Нийтээр тэмдэглэх баярын болон тэмдэглэлт өдрүүдийн тухай хуулийн 4 дүгээр зүйлд “4.1.9.Бүгд Найрамдах улс тунхагласан өдөр: 11 дүгээр сарын 26” гэсэн дурдсан агуулгатай 4.1.9 дэх заалт нэмж, мөн хуулийн 5 дугаар зүйлийн 5.1.16 дахь заалтыг хүчингүй болсонд тооцохоор болсон байна.