Шинэчлэн найруулсан Эрүүгийн хуулийг дагаж мөрдөж эхэлснээс хойш даруй дөрвөн жил гаруй хугацаа өнгөрчээ. Энэ хугацаанд хуулийг нэг мөр ойлгон хэрэглэх, хуулийн хэрэгжилтийг хангах чиглэлээр нэлээд ажил зохион байгуулсан ч практикт хэрэгжүүлэхэд хүндрэлтэй, эрх зүйн хийдэл бүхий зохицуулалт цөөнгүй байгаагийн нэг нь Эрүүгийн хуулийн 1.10 дугаар зүйлд заасан “Гэмт хэргийг хөөн хэлэлцэх хугацаа”-ны талаарх зохицуулалт юм. Тухайлбал, хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн гэмт хэрэг болон хорих, зорчих эрхийг хязгаарлах ялтай зарим гэмт хэрэгт хөөн хэлэлцэх хугацааг хэрхэн тоолох нь өнөөг хүртэл тодорхойгүй байсаар байна. Түүнчлэн тодорхой төрлийн зарим гэмт хэргийн тухайд хөөн хэлэлцэх хугацааг ялгамжтай тогтоох шаардлага нийгэмд үүсээд байгаа билээ. Иймд дээр дурдсан асуудлыг судлах хэрэгцээ, шаардлагыг харгалзан Нээлттэй нийгэм форум байгууллагын захиалгаар судлаачид “Гэмт хэргийг хөөн хэлэлцэх хугацаа: Тулгамдаж буй асуудал” сэдэвт судалгааг хийж, холбогдох санал, зөвлөмжүүдийг боловсруулжээ. Тус судалгаагаар Эрүүгийн хуульд заасан гэмт хэргийг хөөн хэлэлцэх хугацаатай холбоотой эрх зүйн зохицуулалтын ач холбогдол, онцлог, эл ойлголтын түүхэн уламжлал, гадаадын зарим орны гэмт хэргийг хөөн хэлэлцэх хугацааг хуульчилсан байдлыг харьцуулан судлах, тус зохицуулалтыг практикт хэрэгжүүлэхэд тулгамдаж буй асуудал, эрх зүйн хийдэл, цаашид энэхүү зохицуулалтыг боловсронгуй болгох арга замыг эрэлхийлсэн байна. Эх сурвалж: Судалгааг бүрэн эхээр нь www.forum.mn сайтаас үзнэ үү.