Засгийн газрын 2026 оны 08 дугаар сарын 26-ны өдрийн 353 дугаар тогтоолын хавсралтаар Сүү боловсруулах үйлдвэр, цехэд техникийн зохицуулалтын шаардлагад нийцсэн түүхий сүү нийлүүлсэн малчин, эрчимжсэн мал аж ахуй эрхлэгчид мөнгөн урамшуулал олгох журмыг баталсан байна. Тус журмаар сүү боловсруулах үйлдвэр, цехэд техникийн зохицуулалтын шаардлагад нийцсэн түүхий сүү нийлүүлсэн малчин, эрчимжсэн мал аж ахуй эрхлэгчид мөнгөн урамшуулал олгохтой холбогдсон харилцааг зохицуулна. Урамшууллын зорилго нь сэрүүний улиралд түүхий сүүний нийлүүлэлт, сүү, сүүн бүтээгдэхүүний үйлдвэрлэлийг тогтвортой байлгах, малчин, эрчимжсэн мал аж ахуй эрхлэгчдийн сүү нийлүүлэх сонирхлыг нэмэгдүүлж, тэдний орлогыг өсгөхөд оршино.

Энэ журамд заасан шаардлагыг хангасан малчин, эрчимжсэн мал аж ахуй эрхлэгчид олгох мөнгөн урамшууллыг тухайн оны 11 дүгээр сарын 01-ээс дараа оны 03 дугаар сарын 31-ний өдрийг дуусталх хугацаанд сүү боловсруулах үйлдвэр, цехэд нийлүүлсэн сүүний 1 литр тутамд 1000 (нэг мянга) төгрөгөөр тооцож, сар бүр олгоно.

Малчин, эрчимжсэн мал аж ахуй эрхлэгч нь урамшуулалд хамрагдах хүсэлтээ үйлдвэр, цехэд сүү нийлүүлсэн тухайн сарын сүүлийн өдрөөр тасалбар болгон дараа сарын 10-ны өдрийн дотор хүнсний асуудал эрхэлсэн төрийн захиргааны төв байгууллагын урамшууллын цахим систем (https://tus.mofa.gov.mn)-д илгээнэ. Малчин, эрчимжсэн мал аж ахуй эрхлэгчид олговол зохих урамшууллыг сүү бэлтгэн нийлүүлсэн тухайн сарын сүүлийн өдрөөр тасалбар болгон малын эрүүл мэндийн бүртгэл, мэдээллийн сангийн болон татварын бүртгэл, мэдээллийн нэгдсэн сангийн мэдээлэлд тус тус үндэслэн тооцно.

Сүү нийлүүлэх малчин, эрчимжсэн мал аж ахуй эрхлэгч нь дараах шаардлагыг хангасан байхаар тус журамд заасан байна. Үүнд:

• малын тоо, үүлдэр, омог, шилжилт хөдөлгөөний мэдээллийг үндэсний бүртгэл, мэдээллийн нэгдсэн санд үнэн зөв бүртгүүлсэн байх;
• мал сүргээ ялган тэмдэглэж, үндэсний бүртгэлийн нэгдсэн санд бүртгүүлсэн байх;
• саалийн малыг мал эмнэлгийн урьдчилан сэргийлэх үзлэг, шинжилгээнд хамруулан, эрүүл болохыг баталгаажуулж мал эмнэлгийн гэрчилгээ авсан байх;
• татварын төлбөрийн баримтын цахим системд өөрийн нэр, регистрийн дугаараар бүртгүүлсэн байх;
• үйлдвэр, цехтэй сүү бэлтгэн нийлүүлэх гэрээг байгуулсан байх;
• мөнгөн урамшуулалд хамрагдах хүсэлтийг цахим системээр гаргаж, мэдээлэл ашиглах зөвшөөрлийг өгсөн байх.

Харин Үйлдвэр, цех нь дараах шаардлагыг хангасан байна. Үүнд:

• Хүнсний бүтээгдэхүүний аюулгүй байдлыг хангах урьдчилсан хяналт шалгалтын дүгнэлттэй, эсхүл үйлдвэрлэл эхлүүлэх эрх үүссэн байх;
• энэ журмын 1.3-т заасан техникийн зохицуулалтын шаардлагад нийцсэн зориулалтын барилга байгууламж, тоног төхөөрөмж, багаж хэрэгсэл, агуулах, тээврийн хэрэгсэлтэй байх;
• шинээр үйлдвэрлэл эхлүүлснээс бусад үйлдвэр, цехийн хувьд харьяа аймаг, нийслэлийн эрх бүхий хяналтын байгууллагаар сүүлийн 3 жилийн аль нэг жилийн үйл ажиллагааг дүгнүүлсэн байх;
• худалдан авсан сүү, үйлдвэрлэсэн, борлуулсан бүтээгдэхүүнийг Нягтлан бодох бүртгэлийн тухай, Аж ахуйн нэгжийн орлогын албан татварын тухай хуульд заасны дагуу санхүүгийн болон татварын тайланд тусган баталгаажуулсан байх;
• малчин, эрчимжсэн мал аж ахуй эрхлэгчтэй сүү нийлүүлэх, худалдан авах гэрээг байгуулж, худалдан авсан байх;
• сүү худалдан авах бүрд худалдан авалтын тоо хэмжээ, сүүний чанарын үзүүлэлт болон үнийн мэдээллийг сүү бэлтгэлийн систем (https://milk.mofa.gov.mn)-д тухай бүр үнэн, зөв, бүртгэдэг байх;
• малчин, эрчимжсэн мал аж ахуй эрхлэгчээс сүү худалдан авах бүрд Нэмэгдсэн өртгийн албан татварын тухай хуульд заасан төлбөрийн баримт (И баримт)-ыг үйлдэн татварын бүртгэл, мэдээллийн нэгдсэн санд баталгаажуулсан байх.

Эх сурвалж: https://legalinfo.mn/mn/detail?lawId=17894493447782&showType=1