Амьтан гэдэгт Монгол Улсын нутаг дэвсгэрт байнга буюу түр нутагшсан хөхтөн, шувуу, мөлхөгч, хоёр нутагтан, загас, хавч хэлбэртэн шавьж, зөөлөн биетэн, эгэл биетэн хамаарна. Амьтныг хамгаалах хэлбэр, амьтныг сэргээн нутагшуулах, агнуурын амьтан агнах барихыг хориглох хугацаа, амьтныг өмчлөх эзэмших, ашиглах, ан агнуур, амьтны мэдээллийн сан, төлбөр санхүүжилт, хууль зөрчигчид хүлээлгэх хариуцлагын талаар “Амьтны тухай хууль”-д зохицуулсан байна. Иргэн, хуулийн этгээд нэн ховроос бусад амьтныг хамгаалах, өсгөн үржүүлэх, ашиглах зорилгоор тодорхой нөхцөл, болзол бүхий гэрээний үндсэн дээр эзэмшиж болно. Амьтан эзэмшүүлэх журмыг Засгийн газар тогтоож, аймаг, сумын иргэдийн Төлөөлөгчдийн Хурал шийдвэрлэнэ. Түүнчлэн хууль болон гэрээнд заасны дагуу амьтныг гэмтээлгүйгээр түүний аль нэг ашигтай шинж чанарыг ашиглах үйл ажиллагааг “амьтныг ашиглах” гэх буюу амьтныг дор дурдсан хэлбэрээр ашиглаж болно: – Эрдэм шинжилгээний ажил, соёл урлаг, гоо зүйн зориулалтаар ашиглах; – Хөрс бүрдүүлэх, байгалийг ариутгах, ургамалд тоос хүртээх зэрэг амьдралын үйл ажиллагааны хэрэгтэй чанарыг ашиглах; – Амьдралын үйл ажиллагааны бүтээгдэхүүнийг авах зорилгоор ашиглах. Дээр дурдсанаас бусад хэлбэрээр амьтныг ашиглах зохицуулалтыг Засгийн газар батална. Мөн нэн ховор амьтныг амьдаар нь гадаад улсад гаргах зөвшөөрлийг Монгол Улсын нэгдэн орсон олон улсын гэрээний дагуу олгоно.