БҮХ НИЙТИЙН БЭЛЭН БАЙДЛЫН V ДУГААР ЗЭРЭГТ ШИЛЖИХ ШИЙДВЭРИЙГ УЛСЫН ОНЦГОЙ КОМИССООС ГАРГАЛАА
Улсын онцгой комиссийн 2021 оны 02 дугаар сарын 03-ны өдрийн хуралдаанаар нийслэлд 2021 оны 02 дугаар сарын 11-ний өдрийн 06.00 цагаас 02 дугаар сарын 23-ны өдрийн 06.00 цаг хүртэл Гамшгаас хамгаалах бүх нийтийн бэлэн байдлын зэрэгт хэсэгчилсэн байдлаар шилжих шийдвэрийг гаргаж, шийдвэрийг Засгийн газрын хуралдаанаар хэлэлцүүлэхээр болсон байна.
Энэ нь цар тахлын тархалтыг таслан зогсоож голомтыг хумих, аль болох олон иргэнийг шинжилгээнд хамруулах, халдвартай хүн болон ойрын, дам хавьтлыг тусгаарлан эмчлэх зорилготой.
Эрүүл мэндийн яам “Нэг хаалга-Нэг шинжилгээ” гэсэн зарчмаар 420 мянган өрх тус бүрээс нэг хүнийг шинжилгээнд хамруулахаар тооцоолсон байна.
Эрүүл мэнд, Онцгой, Мэргэжлийн хяналт, Тагнуул, Цагдаа, Дотоодын цэрэг, сонсогчид, нийслэлийн харьяа зэрэг байгууллагын ажилтан, албан хаагчдыг энэхүү хөл хорионы хугацаанд дайчлан ажиллуулахаар болжээ.
Хөл хорио тогтоох хүртэл хугацаанд иргэдийн эрүүл мэндийг хамгаалах, эдийн засгийг сэргээхтэй холбоотой цогц төлөвлөгөөг Засгийн газрын хуралдаанаар хэлэлцүүлэн батлуулж, Улаанбаатар хотод ирээд гацсан орон нутгийн харьяалалтай иргэдийг PCR шинжилгээнд хамруулж сар шинийн баяраас өмнө нэгдсэн зохион байгуулалттайгаар буцаахаар болсон байна.
Харин хөл хорио тогтоосноос хойш эрүүл мэндийн болон ар гэрийн гачигдал зэрэг хүндэтгэн үзэх шалтгаантай иргэдийг л Улаанбаатар хот руу ирэх, хотоос гарахыг зөвшөөрөх бөгөөд сар шинийн баярыг бүх нийтээр тэмдэглэхгүй байх тухай Засгийн газрын шийдвэрийг аймаг, сумдын удирдлагууд тухайн нутаг дэвсгэртээ хэрэгжүүлэх ёстойг Улсын онцгой комисс анхаарууллаа.
Эх сурвалж: https://nema.gov.mn/n/112094