Нийгмийн даатгалын шимтгэл төлөгч нь Ажилгүйдлийн даатгалын сангаас ямар төрлийн тэтгэмж, хөнгөлөлтийг авч болох вэ?

Нийгмийн даатгалын шимтгэл төлөгч нь Ажилгүйдлийн даатгалын сангаас дараах тэтгэмж, хөнгөлөлтийг хувь тэнцүүлэн авч болно. Үүнд: 1. Ажилгүйдлийн тэтгэмж; 2. Шимтгэлийн хөнгөлөлт. Нийгмийн даатгалын сангаас олгох тэтгэмжийн тухай хууль 2 дугаар зүйл

Ямар ажил, үйлчилгээ албадан хөдөлмөрлүүлэхэд хамаарахгүй бэ?

Дараах ажил, үйлчилгээ албадан хөдөлмөрлүүлэхэд хамаарахгүй. Үүнд: - Суурь боловсрол эзэмших; - Хугацаат цэргийн албан хаагчийн хийж гүйцэтгэж байгаа цэргийн зориулалттай ажил, үйлчилгээ; - Тухайн нутаг дэвсгэр, хот, тосгон, суурин газрын оршин суугчийн хувьд хийх тохижилт, цэвэрлэгээний хөнгөн ажил; - Шүүхийн хүчин төгөлдөр шийдвэрийн дагуу нийтэд тустай ажил хийлгэх, эсхүл ял эдлэх явцад төрийн байгууллага, албан хаагчийн удирдлага, хяналтын доор хийж гүйцэтгэх ажил, үйлчилгээ. Ялтныг аливаа хувь хүн, аж ахуйн нэгж, байгууллагад ажиллуулах, тэдний мэдэлд шилжүүлэхийг хориглоно; - Улс орныг батлан хамгаалах, хүний амь нас, эрүүл мэндийг хамгаалахад зайлшгүй шаардлагатай ажил гүйцэтгэх, гамшиг, аюулт үзэгдэл, ослоос урьдчилан сэргийлэх, түүний хор уршгийг нэн даруй арилгахтай холбоотой ажил, үйлчилгээ. Хэрэв хүнийг албадан хөдөлмөрлүүлсэн, албадан хөдөлмөрлүүлэхэд зуучилсан, зохион байгуулсан хүн, хуулийн этгээдэд Эрүүгийн хуульд заасан хариуцлага хүлээлгэнэ. Хөдөлмөрийн тухай хууль 8 дугаар зүйлийн 8.3 дахь хэсэг

Албадан хөдөлмөрлүүлэх гэж юу бэ? Хориглох тохиолдол байгаа юу?

"Албадан хөдөлмөрлүүлэх" гэж аливаа торгууль, шийтгэл ногдуулахаар айлган сүрдүүлэх, хүч хэрэглэх, хүч хэрэглэхээр заналхийлэх замаар хүнийг хүсэл зоригийнх нь эсрэг ажил, үйлчилгээ эрхлүүлэхийг ойлгох ба хэнийг ч албадан хөдөлмөрлүүлэхийг хориглоно. Хөдөлмөрийн тухай хууль 8 дугаар зүйл 8.1, 8.2 дахь хэсэг

Гадаад улсын иргэн үрчлэн авсан хүүхэд хэдэн нас хүрээд Монгол Улсын харьяатаас гарах хүсэлт гаргаж болох вэ?

Гадаадын иргэн эхнэр, нөхрийн үрчлэн авсан Монгол Улсын харьяат 16 насанд хүрсэн хүүхдийг тэдний хүсэлтээр Монгол Улсын харьяатаас гарахыг зөвшөөрч болно.

Эцэг нь гадаад улсын иргэн юм. Бидний дундаас төрсөн хүүхэд аль улсын иргэн болох вэ?

Эцэг, эхийн аль нэг нь Монгол Улсын харьяат, нөгөө нь гадаад улсын харьяат бол Монгол Улсын нутаг дэвсгэр дээр төрсөн тэдний хүүхэд Монгол Улсын харьяат байна. Хэрэв хүүхэд гадаад улсын нутаг дэвсгэр дээр төрсөн бол хүүхдийн иргэний харьяаллыг эцэг, эхийн харилцан бичгээр, эсхүл тоон гарын үсгээр баталгаажуулсан цахим хэлбэрээр тохиролцсоны үндсэн дээр шийдвэрлэнэ.

Гэрээслэгч бүх эд хөрөнгөө хууль ёсны өвлөгч биш этгээдэд гэрээслэн үлдээсэн тохиолдолд хууль ёсны өвлөгчдөд өв өвлүүлэх боломжтой юу?

Гэрээслэгч бүх эд хөрөнгөө хууль ёсны өмчлөгч бус этгээдэд гэрээслэх тохиолдолд өвлүүлэгчийн насанд хүрээгүй буюу хөдөлмөрийн чадваргүй, түүнчлэн түүнийг нас барсан хойно төрсөн хүүхэд, түүний асрамжинд байсан хөдөлмөрийн чадваргүй нөхөр /эхнэр/, төрүүлсэн болон үрчилсэн эцэг, эх, хууль ёсны бусад өвлөгчдөд хуульд зааснаар өвлүүлбэл зохих хөрөнгийн хоёрны нэгээс багагүй хэсгийг заавал өвлүүлнэ. Ийнхүү заавал өвлүүлэх хэсгийн хэмжээг тодорхойлохдоо хуваарьт болон дундаа хамтран өмчлөх эд хөрөнгийн өвлүүлэгчид оногдох хэсгийг оролцуулан тооцно.

Аж ахуйн нэгж гэж юуг хэлэх вэ?

"Аж ахуйн нэгж" гэж улсын бүртгэлд бүртгэгдэж, аж ахуйн үйл ажиллагаа эрхэлж байгаа компани, нөхөрлөл, хоршоо, төрийн болон орон нутгийн өмчит аж ахуйн тооцоотой үйлдвэрийн газар, тэдгээртэй адилтгах орлогын албан татвар төлөх үүрэг бүхий хуулийн этгээд, хуулийн этгээдийн эрхгүй этгээд болон үндсэн үйл ажиллагаа нь ашгийн бус боловч бараа борлуулах, ажил гүйцэтгэх, үйлчилгээ үзүүлж орлого олсон дотоод, гадаадын хуулийн этгээдийг хэлнэ. Эх сурвалж: Аж ахуйн нэгжийн орлогын албан татварын тухай хуулийн 4 дүгээр зүйлийн 4.1.1

Компанийн дүрмийн болон гэрчилгээний хуулбарыг хаанаас авах вэ?

Компанийн дүрмийн хуулбар бусад холбогдох баримт бичгийн хуулбарыг харьяалал харгалзахгүйгээр Нийслэлд Улсын бүртгэлийн 28 нэгж болон орон нутгийн улсын бүртгэлийн хэлтсээс өөрийн биеэр очиж эсхүл итгэмжлэгдсэн төлөөлөгчөөрөө дамжуулан авах боломжтой.

Хуулийн этгээдийн дүрэм, гэрчилгээ, холбогдох баримт бичгийн хуулбарыг хаанаас авах вэ?

Хуулийн этгээдийн дүрмийн хуулбар бусад холбогдох баримт бичгийн хуулбарыг харьяалал харгалзахгүйгээр Нийслэлд Улсын бүртгэлийн 28 нэгж болон орон нутгийн улсын бүртгэлийн хэлтсээс биечлэн очиж авах боломжтой.

Зөвшөөрлийн код гэж юу вэ? Хаанаас, хэрхэн тогтоох вэ?

Зөвшөөрлийн нэгдсэн бүртгэл хөтлөх, статистик мэдээг эрхлэн гаргах, лавлагаа өгөх, цахим хэлбэрээр зөвшөөрөл олгох зорилгоор зөвшөөрлийг кодолно. Эдийн засаг, хөгжлийн асуудал эрхэлсэн төрийн захиргааны төв байгууллага зөвшөөрлийн кодыг эдийн засгийн үйл ажиллагааны ангилал, барааны ангиллын жагсаалт болон үндэсний кодыг харгалзан тогтооно. Зөвшөөрлийн тухай хуулийн 2.3 дугаар зүйл

Тусгай зөвшөөрлийг хэдэн жилийн хугацаагаар олгох вэ?

Тусгай зөвшөөрлийг таван жилээс доошгүй, энгийн зөвшөөрлийг гурван жилээс доошгүй хугацаагаар олгох бөгөөд байгалийн баялаг, төрийн нийтийн өмчийг хязгаартайгаар ашиглуулахаар олгосон зөвшөөрлийг хугацаатай олгоно. Байгалийн баялаг, төрийн нийтийн өмчийг хязгаартайгаар ашиглуулахаар олгосон зөвшөөрлөөс бусад зөвшөөрлийг хуульд заасан тохиолдолд хугацаагүй олгож болно. Зөвшөөрлийн тухай хуулийн 2.2 дугаар зүйл

Газар өмчлөх эрх ямар тохиолдолд дуусгавар болох бэ?

“Монгол улсын иргэнд газар өмчлүүлэх тухай” хуулийн 31.1-т заасны дагуу өмчийн газраа бусад иргэний өмчлөлд шилжүүлснээр, газар өмчлөх эрхээсээ татгалзсанаар, газар өмчлөгч иргэн Монгол улсын харьяатаас гарснаар, хууль тогтоомжид заасан бусад үндэслэлээр тус тус дуусгавар болно. Эх сурвалж: Газрын тухай хуулийн 31 дүгээр зүйлийн 31.1дэхь хэсэг

Үл хөдлөх эд хөрөнгийн барьцааны гэрээг эд хөрөнгийн эрхийн улсын бүртгэлд бүртгүүлэхгүй байж болох уу?

Барьцааны гэрээг эд хөрөнгийн эрхийн улсын бүртгэлийн газарт бүртгүүлнэ. Эх сурвалж: Үл хөдлөх эд хөрөнгийн барьцааны тухай хуулийн 12.1

Зээлийн гэрээний үндсэн шинжүүд юу вэ?

Зээлийн гэрээгээр зээлдүүлэгч нь зээлдэгчийн өмчлөлд мөнгө буюу төрлийн шинжээр тодорхойлогдох эд хөрөнгө шилжүүлж, зээлдэгч нь үүнийг тохирсон хугацаанд ижил төрөл, тоо, чанар, хэмжээ бүхий эд хөрөнгө буюу мөнгөөр буцаан төлөх үүрэг хүлээнэ. Эх сурвалж: Иргэний хуулийн 281 дугаар зүйл

Гэрээ байгуулах санал нь ямар шаардлагыг хангасан байх ёстой вэ?

Гэрээ байгуулах санал нь тодорхой нэг буюу хэд хэдэн этгээдэд хандан, эрх үүргийн хувьд холбогдохоор, хүсэл зоригийг бодитойгоор, хангалттай тодорхой илэрхийлсэн байх ёстой. Мөн уг саналд гэрээний гол нөхцөл буюу түүнийг тодорхойлох журам заасан байх шаардлагатай. Эх сурвалж: Иргэний хуулийн 195.1 болон 195.2

Барилга байгууламж барих, үйлдвэрлэл, үйлчилгээ эрхлэхэд агаар хамгаалах талаар тавигдах ямар шаардлагатай вэ?

Барилга байгууламж барих, үйлдвэрлэл, үйлчилгээ эрхлэхэд агаар хамгаалах талаар тавигдах дараах шаардлагыг тавина. Үүнд: 1.Үйлдвэрлэл, үйлчилгээний болон бусад зориулалттай барилга байгууламжийн байршлыг сонгох, зураг төсөл зохиох, барих, өргөтгөл, шинэчлэл, засварын ажил гүйцэтгэх, ашиглалтад оруулах, технологи, тоног төхөөрөмж суурилуулах, тэдгээрийг өөрчлөх, шинэчлэхэд агаарын чанарын стандарт болон физикийн сөрөг нөлөөллийн стандартыг үндэслэнэ. 2.Агаарын бохирдлын томоохон суурин эх үүсвэрийн барилга байгууламжийг барьж байгуулахад байгаль орчинд нөлөөлөх байдлын үнэлгээ хийлгэнэ. 3.Агаарт онцгой хортойгоор нөлөөлж болзошгүй үйлдвэрлэл, үйлчилгээний зориулалттай барилга байгууламж барих асуудлыг зохих шатны иргэдийн Төлөөлөгчдийн Хурлын санал, байгаль орчинд нөлөөлөх байдлын үнэлгээний дүгнэлтийг үндэслэн барилгын асуудал эрхэлсэн төрийн захиргааны төв байгууллага шийдвэрлэнэ. 4.Суурин газрын агаар хамгаалах зорилгоор үйлдвэрлэл, үйлчилгээний зориулалттай барилга байгууламжид ариун цэврийн хамгаалалтын бүс тогтоож хүн амын суурьшлын бүсээс зааглах бөгөөд уг бүсийн хэмжээг үйлдвэрлэл, үйлчилгээний салбар, төрөл бүрээр тогтоосон жагсаалтыг эрүүл мэндийн асуудал эрхэлсэн төрийн захиргааны төв байгууллага батална. 5.Агаар хамгаалах шаардлага хангаагүй техник, технологи нэвтрүүлэх, материал, бодис, бүтээгдэхүүнийг хэрэглэх, тоног төхөөрөмж, техник хэрэгсэл ашиглахыг хориглоно. Агаарын тухай хууль, 21 дугаар зүйл

Агаарын чанарыг сайжруулах бүсэд хориглох ямар зүйлс байдаг вэ?

Агаарын чанарыг сайжруулах бүсэд хориглох зүйлсэд: - Агаарын чанарыг сайжруулах бүсэд дараах үйл ажиллагаа явуулахыг хориглоно: - зориулалтын бус газарт хог хаягдал хаях, ил задгай шатаах; - агаар бохирдуулах бодис ялгаруулдаг үйлдвэрлэл, үйлчилгээ эрхлэх; - агаарын тухай хуульд заасан урамшуулал бүхий цахилгаан эрчим хүчийг ахуйн зориулалтаас бусад хэлбэрээр ашиглах; - стандартын шаардлага хангаагүй цахилгаан халаах хэрэгсэл ашиглах; - түүхийн нүүрс болон агаар бохирдуулах бусад хаягдал зүйлс шатаах. - Монгол Улсын стандартаар тогтоосон экологийн хамгийн өндөр ангиллаас доош ангиллын, эсхүл уг ангиллын стандартын шаардлага хангаагүй автобензин, дизель түлшийг жижиглэнгээр худалдан борлуулах зэрэг багтана. Агаарын тухай хууль, 16 дугаар зүйл

Дундаа хамтран өмчилдөг үйлчилгээний зориулалттай газрыг барьцаанд тавихын тулд заавал хоёр өмчлөгчийн зөвшөөрөл хэрэгтэй юу?

Хамтран өмчлөх дундын өмчлөлд байгаа үл хөдлөх эд хөрөнгө, түүнтэй холбоотой эрхийг барьцаалуулахад барьцааны зүйлийн өмчлөгч тус бүрийн зөвшөөрлийг бичгээр, эсхүл тоон гарын үсгээр баталгаажуулсан цахим хэлбэрээр авна. Эх сурвалж: Үл хөдлөх эд хөрөнгийн барьцааны тухай хуулийн 10.1