ЗАСГИЙН ГАЗРЫН 2021 ОНЫ 02 ДУГААР САРЫН 10-НЫ ӨДРИЙН ЭЭЛЖИТ ХУРАЛДААНААР НИЙСЛЭЛД ГАМШГААС ХАМГААЛАХ БҮХ НИЙТИЙН БЭЛЭН БАЙДЛЫН ЗЭРЭГТ ШИЛЖҮҮЛЭХЭЭР ШИЙДВЭРЛЭЛЭЭ
Засгийн газрын 2021-02-10-ны өдрийн ээлжит хуралдаанаар 2021 оны 02 дугаар сарын 11-ний өдрийн 06:00 цагаас 02 дугаар сарын 23-ны өдрийн 06:00 цаг хүртэл хугацаанд нийслэлд Гамшгаас хамгаалах бүх нийтийн бэлэн байдлын зэрэгт хэсэгчлэн шилжүүлэх Улсын онцгой комиссын шийдвэрийг дэмжлээ. Энэ хугацаанд нийслэлээс гарах, орох зорчигч тээврийн хөдөлгөөнийг хязгаарлаж, иргэдийн хөдөлгөөнийг 90 хүртэл хувь бууруулахаар болжээ.
Мөн “Нэг хаалга-Нэг шинжилгээ”-ний хүрээнд хоногт 35-40 мянган хүнийг шинжилгээнд хамруулахаар болсон байна.
Гамшгаас хамгаалах бүх нийтийн бэлэн байдлын зэрэгт шилжүүлсэн хугацаанд дараах байгууллагуудын үйл ажиллагааг нь хязгаарлахгүй. Үүнд;
1. Эрчим хүч, дулаан, усан хангамж, ариутгал, хог хаягдал, нийтийн аж ахуй, инженерийн хангамж;
2. Эрүүл мэндийн байгууллага, эм, эмнэлгийн хэрэгсэл, ханган нийлүүлэх;
3. Улсын онц чухал болон стратегийн ач холбогдол бүхий объект, байгууллага /“УБТЗ” ХНН, “Чингис хаан”, ИНЕГ, түүний харьяа алба салбар, “Буянт-Ухаа” олон улсын нисэх буудал, “МИАТ” ТӨХК, ”Биокомбинат” ТӨҮГ, уул уурхайн салбарын хангалт, Үндэсний дата төвийн нөөц төв, Дипломат төлөөлөгчийн газар, НҮБ-ын суурин төлөөлөгчийн газар, түүний ажилтан, албан хаагчдын 10 хүртэлх хувь ажиллах, цагийн хязгаартай/;
4. Тусгайлсан чиг үүрэг бүхий байгууллага;
5. УИХ, төрийн захиргаа, төрийн болон нутгийн өөрөө удирдах байгууллага, гааль, шүүх, прокурор, өмгөөлөл, нотариат, Сонгуулийн Ерөнхий хороо /ажилтан, албан хаагчдын 10 хүртэлх хувь ажиллах, цагийн хязгаартай/;
6. Хүүхэд хамгааллын үйлчилгээ, асрамж халамжийн төрөлжсөн байгууллага, МУЗН;
7. Хүнсний үйлдвэрлэл, тээвэрлэлт, түгээлт, худалдаа;
8. Мал, амьтны өвс, тэжээлийн тээвэрлэлт, түгээлт;
9. Газрын тосны бүтээгдэхүүн, түлшний хангамж, түгээлт, тээвэрлэлт;
10. Сайжруулсан түлшний үйлдвэрлэл, нийлүүлэлт, тээвэрлэлт, түгээлт;
11. Банкны цахим болон автомат тооцооны машин;
12. Хэвлэл мэдээлэл, харилцаа холбоо, шуудан, илгээмж;
13. Зөвшөөрөлтэй харуул хамгаалалтын байгууллага;
14. Оршуулгын үйл ажиллагаанууд хамаарна.
Эх сурвалж: https://zasag.mn/news/view/25723