УДШ-Д ГОМДОЛ ГАРГАХ ШИНЭ ЖУРАМ ХЭРЭГЖИЖ ЭХЭЛЛЭЭ.
Шүүхийн тухай хуулийн шинэчилсэн найруулга болон Иргэний хэрэг шүүхэд хянан шийдвэрлэх тухай хуульд оруулсан өөрчлөлтөөр хяналтын журмаар гаргасан гомдлуудыг хэлэлцэх журам өөрчлөгдсөн ба уг өөрчлөлт нь 2021 оны 3 дугаар сарын 1-ний өдрөөс хэрэгжиж эхэлсэн билээ.
Үүнтэй холбогдуулан Улсын Дээд шүүхийн Иргэний хэргийн танхим 2021 оны 3 дугаар сарын 1-ний өдрөөс хойш хяналтын журмаар гаргасан гомдлуудыг хэлэлцэх эсэх асуудлыг шийдвэрлэж буй бөгөөд нийт 70 гомдлыг хүлээн авах эсэхийг хэлэлцээд зөвхөн 1 гомдлыг хэлэлцэхээр болж, бусад 69 гомдлыг дээд шүүхийн шүүх хуралдаанаар хэлэлцүүлэхээс татгалзаж шийдвэрлэсэн байна.
Тодруулбал, Шүүхийн тухай хуулийн шинэчилсэн найруулга батлагдан Иргэний хэрэг шүүхэд хянан шийдвэрлэх тухай хуульд өөрчлөлт орж, Улсын Дээд шүүхэд хяналтын журмаар гомдол гаргах үндэслэлийг илүү нарийвчлан зохицуулсантай холбоотой гэж хуульч, өмгөөлөгчид тайлбарлаж байна.
Эх сурвалж: www.Supremecourt.mn