МОНГОЛ УЛСЫН ЕРӨНХИЙЛӨГЧИЙН ТУХАЙ ХУУЛЬД ӨӨРЧЛӨЛТ ОРУУЛАХ ТУХАЙ ХУУЛИЙН ТӨСЛИЙН АНХНЫ ХЭЛЭЛЦҮҮЛГИЙГ ХИЙВ.
Улсын Их Хурлын Хууль зүйн байнгын хорооны өнөөдрийн (2021.10.19) хуралдаан 14 цаг 24 минутад 11 гишүүний ирцтэй эхэлж, Хуульчийн эрх зүйн байдлын тухай хуулийн шинэчилсэн найруулгын төслийн хамт өргөн мэдүүлсэн Монгол Улсын Ерөнхийлөгчийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийлээ.
Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10-т “Байнгын хороо хуулийн төслийг зүйл бүрээр хэлэлцэнэ” хэмээн заасан байдаг. Энэ дагуу төслийг зүйл бүрээр хэлэлцсэн байна. “Шүүхийн ерөнхий зөвлөлийн дарга, гишүүдийг хуульд заасны дагуу томилж, чөлөөлнө” гэсэн Монгол Улсын Ерөнхийлөгчийн тухай хуулийн 12 дугаар зүйлийн 12.18 дахь хэсгийг хасах төслийн нэгдүгээр зүйлтэй холбогдуулан асуулт асуух, санал хэлэх шаардлагагүй хэмээн гишүүд үзжээ. Энэ үеэр Улсын Их Хурлын гишүүн Ж.Сүхбаатар, Шүүхийн ерөнхий зөвлөл, Шүүхийн сахилгын хороо хэзээ байгуулагдах талаар Байнгын хорооны даргаас тодруулж хариулт авсан.
Үргэлжлүүлэн төслийн хоёрдугаар зүйлтэй холбогдуулан Улсын Их Хурлын гишүүн С.Бямбацогтын гаргасан саналын томьёоллоор санал хураалт явуулан шийдвэрлээд, төслийн анхны хэлэлцүүлгийг хийсэн талаарх Хууль зүйн байнгын хорооны санал, дүгнэлтийг чуулганы нэгдсэн хуралдаанд танилцуулахаар болжээ.
Эх сурвалж: www. http://parliament.mn/n/coayn