ЭРҮҮЛ МЭНДИЙН САЛБАРЫН ЭРХ ЗҮЙН ШИНЭЧЛЭЛИЙН ХҮРЭЭНД ХОЛБОГДОХ ХУУЛЬ, БУСАД ШИЙДВЭРИЙН ТӨСӨЛ БОЛОВСРУУЛАХ ҮҮРЭГ БҮХИЙ АЖЛЫН ХЭСЭГ ХУРАЛДЛАА
Эрүүл мэндийн салбарын эрх зүйн шинэчлэлийн хүрээнд холбогдох хууль, УИХ-ын бусад шийдвэрийн төсөл боловсруулах үүрэг бүхий ажлын хэсгийг УИХ-ын даргын 2022 оны 01 дүгээр сарын 19-ний өдрийн 08 тоот захирамжаар байгуулсан. Уг ажлын хэсгийг анхны хуралдаанаа 2022 оны 02 дугаар сарын 09-ний өдөр хийжээ. Хуралдаанд Эрүүл мэндийн яам, ЭМДЕГ, НЭМҮТ, ХӨСҮТ, ЭХЭМҮТ зэрэг салбарын төлөөллүүд оролцлоо.
Эрүүл Мэндийн Яамны Төрийн нарийн бичгийн дарга Эрүүл мэндийн даатгалын тухай хууль, Эрүүл мэндийн тухай хууль, Эмнэлгийн тусламж үйлчилгээний тухай хуулиудын нэмэлт, өөрчлөлтийн талаарх үнэлгээнүүд хийгдсэн, удахгүй Засгийн газрын хуралдаанаар хэлэлцүүлэхээр бэлтгэл ажил хийгдэж буй талаараа танилцуулжээ.
Нийгмийн эрүүл мэндийн тусламж үйлчилгээний тухай хууль, Дархлаажуулалт тухай хуульд нэмэлт,өөрчлөлт оруулах тухай хууль, Эх хүүхдийн эрүүл мэндийн тухай хууль, Донорын тухай хуульд нэмэлт, өөрчлөлт оруулах зэрэг нийт 12 хууль дээр салбар дундын ажлын хэсэг байгуулагдан судалгаа болон үнэлгээний ажлууд хийгдэж байгаа талаар дурджээ. Хуралдаанд оролцогчид тус хуулиуд болон тулгамдаж буй асуудал, шийдэх гарцуудын талаар ярилцаж саналаа хэлсэн байна.
Эх сурвалж: http://www.parliament.mn/n/yr3on