ЕРӨНХИЙЛӨГЧИЙН ТАВЬСАН ХОРИГИЙГ ХЭРХЭН ХЭРЭГЖҮҮЛЖ БУЙ ТАЛААР
УИХ-аас 2015 оны 8 дугаар сарын 11-ний өдөр баталсан “Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай” хуульд Монгол Улсын Ерөнхийлөгч 2015 оны 08 дугаар сарын 17-ны өдөр хэсэгчлэн хориг тавьсныг хүлээн авсан. Үүнтэй холбогдуулан уг хуульд нэмэлт өөрчлөлт оруулах тухай хуулийн төслийг хууль зүйн байнгын хорооноос боловсруулан УИХ-д өргөн барьсан билээ.
Энэхүү “Өршөөлийн тухай хууль”-д нэмэлт өөрчлөлт оруулах тухай хуулийн төслийн талаарх товч мэдээллийг хүргэж байна. Үүнд:
1. Хуулийн 5 дугаар зүйл. Ялаас өршөөн хасах гэсэн зүйлийн 5.1-д
a. Бусдын бие мах бодид хүнд гэмтэл санаатай учруулах /эрүүгийн хуулийн 96 дугаар зүйл/
b. Бусдын эд хөрөнгийг дээрэмдэх / эрүүгийн хуулийн 147.2 дах хэсэг/
c. Бусдын эд хөрөнгийг залилан мэхэлж авах / эрүүгийн хуулийн 148.4 дэхь хэсэг/
d. Бусдын эд хөрөнгийг завших, үрэгдүүлэх / эрүүгийн хуулийн 150.3 дахь хэсэг /
e. Төрийн албан тушаалтан эрх мэдлээ хэтрүүлэх /Эрүүгийн хуулийн 264 дүгээр зүйл/
f. Төрийн албан тушаалтан албаны эрх мэдэл буюу албан тушаалын байдлаа урвуулах /Эрүүгийн хуулийн 263 дугаар зүйл/,
g. Хээл хахууль авах /Эрүүгийн хуулийн 268 дугаар зүйл/
h Хууль бусаар хөрөнгөжих /Эрүүгийн хуулийн 2701 дүгээр зүйл/
i. Төсвийн хөрөнгийг зориулалтын бусаар зарцуулах /Эрүүгийн хуулийн 273 дугаар зүйл/ зэрэг эрүүгийн хуулийн тусгай ангид заасан гэмт хэргийг үйлдэн ял шийтгүүлсэн ялтны эдлээгүй үлдсэн хорих ялаас хоёр жилийг хасахаар тус тус нэмэн оруулсан байна.
2. Хуулийн 9 дүгээр зүйлийн 9.1.3 дахь заалтаас дараах хэсгийг хасахаар төсөлд оруулжээ.
a. Бусдын бие мах бодид хүнд гэмтэл санаатай учруулах /эрүүгийн хуулийн 96 дугаар зүйл/
b. Бусдын эд хөрөнгийг дээрэмдэх / эрүүгийн хуулийн 147.2 дах хэсэг/ зэрэг зүйл гэмт хэрэг үйлдсэн хүмүүсийг өршөөлд хамруулахаар өөрчлөн найруулж төсөлд тусгасан байна.