УЛСЫН БҮРТГЭЛИЙН ЕРӨНХИЙ ХУУЛИЙН ТӨСЛӨӨР ХЭЛЭЛЦҮҮЛЭГ ЗОХИОН БАЙГУУЛАВ
Монгол Улсын Засгийн газрын 2016-2020 оны үйл ажиллагааны хөтөлбөрт улсын бүртгэлийн үйл ажиллагааг онлайн горимд шилжүүлж, үндэсний цахим баримт бичгийн хэрэглээг нэмэгдүүлэх, “Нэг иргэн, нэг бүртгэл” хөтөлбөрийг хэрэгжүүлэх замаар бүртгэлийн тогтолцоог үе шаттай төгөлдөржүүлэх, бүртгэлийн үйлчилгээг түргэн шуурхай, чирэгдэлгүй бөгөөд ил тод, нээлттэй болгох чиглэлээр одоо үйлчилж буй эрх зүйн орчныг сайжруулах, олон улсын чиг хандлагад нийцүүлэн боловсронгуй болгох зорилтыг дэвшүүлсэн билээ.
Энэ хүрээнд Хууль зүй, дотоод хэргийн яам, Оюуны өмч Улсын бүртгэлийн ерөнхий газар, Хууль зүйн үндэсний хүрээлэн хамтран Хууль тогтоомжийн тухай хуулиар тогтоосон журмын дагуу 3 дугаар сарын 27-ны өдөр Улсын бүртгэлийн ерөнхий хууль, Хуулийн этгээдийн улсын бүртгэлийн тухай хуулиудын шинэчилсэн найруулгын төслийн хэлэлцүүлгийг зохион байгуулав.
Улсын бүртгэлийн ерөнхий хуулиар улсын бүртгэлийн нэгдсэн тогтолцоо, байгууллагын чиг үүрэг, удирдлагын бүрэн эрх, үйл ажиллагааны хяналт, мэдээллийн сантай холбоотой харилцааг нарийвчлан зохицуулж, иргэний, эд хөрөнгийн, хуулийн этгээдийн улсын бүртгэлийн төрлүүдийг холбогдох хуульд нийцүүлэн шинэчлэн тогтоож, цахим иргэний үнэмлэхийн хэрэглээг нэмэгдүүлэх чиглэлээр холбогдох өөрчлөлтүүдийг тусгасан.
Хуулийн этгээдийн улсын бүртгэлийн тухай хуулийн төсөлд уг хуулийн зохицуулалтыг Иргэний хуулийн агуулга, үзэл баримтлалд нийцүүлж улсын бүртгэлийн байгууллагаас бүртгэх хуулийн этгээдийн төрлийг шинэчлэн тогтоож, эрх зүйн зохицуулалтгүй байдлаас шалтгаалж иргэдэд ойлгомжгүй, маргаантай нөхцөл байдлуудыг шийдвэрлэх. Мөн хуулиас дээгүүр болзол шаардлагыг дүрэм, журмаар тогтоохоос татгалзаж. дүрэм журмаар зохицуулж байгаа зарим суурь харилцааг хуулийн хүрээнд илүү тодорхой, нийтэд ойлгомжтой болгон хуулийн этгээдийн улсын бүртгэлд бүртгэх хугацааг уян хатан болгох, богиносгох чиглэлээр холбогдох өөрчлөлтүүдийг тусгажээ.
Эх сурвалж: ОЮУНЫ ӨМЧ, УЛСЫН БҮРТГЭЛИЙН ЕРӨНХИЙ ГАЗАР
https://www.news.mn/c/2?id=274604